Prokuroria Themelore në Prizren ka kërkuar nga Gjykata Themelore caktimin e masës së paraburgimit në kohëzgjatje prej 30 ditësh ndaj F.B., i cili ndodhet në ndalim 48-orësh, nën dyshimin për kryerjen e veprës penale “Vrasje e rëndë”.

Sipas prokurorisë, rasti ka ndodhur më 20 janar 2026 në fshatin Restelicë, komuna e Dragashit. Dyshohet se i pandehuri, në shtëpinë e tij familjare ku jetonte bashkë me viktimën, ka privuar nga jeta nënën e tij, T.B.

Hetimet fillestare tregojnë se viktima fillimisht është goditur me grushte në pjesë të ndryshme të trupit, ndërsa më pas është shtrënguar për fyti, duke ndërruar jetë në vendin e ngjarjes si pasojë e lëndimeve të marra.

Prokuroria ka bërë të ditur se veprimet e dyshuara përbëjnë elemente të veprës penale “Vrasje e rëndë”, sipas Kodit Penal të Republikës së Kosovës, ndërsa procedurat hetimore ndaj rastit janë duke vazhduar./Arbresh.info